La pleiv Castrisch/Riein/Sevgein secumpona dallas pleivs, pli baul autonomas, Castrisch (cun diaspora Sevgein) e Riein. Omisduas pleivs ein sedecididas per la reformaziun suenter ch’ils artechels da Glion (1526) ein i en vigur.

La baselgia da Castrisch (Kästris) vegn numnada per l’emprema ga egl urbari dils beins imperials da 825, allura puspei egl urbari carolingic da 831 e quei sco „Ecclesiae Sancti Georgii in Kestris“; ei setractava dad ina pintga caplutta cun ina nav da 4,70 x 9,50 meters e d’ina  apsida en fuorma da fier cavagl. Entuorn 1150 ei il clutger roman vegnius  baghegiaus vidlunder. Igl onn 1470 succeda ina cumpletaziun en stil gotic. Cun la conversiun dils vischins da Castrisch tier la reformaziun ein quels da Sevgein (Seewis i.O.), ch’ein restai tier la veglia cardientscha, sesligiai dalla pleiv materna da Castrisch.

La baselgia da s. Nazari a Riein vegn numnada per l’emprema ga egl urbari carolingic da 831 sco atgna baselgia roiala. Igl onn 960 ei quella vegnida surdada agl uestg Hartbert da Cuera. Aunc avon igl onn 1000 ei il clutger carolingic vegnius baghegiaus. Dapi quei temps ha Riein s’udiu tier la gronda pleiv da Sagogn. Igl onn 1487 ei la pleiv da Riein daventada ina pleiv autonoma, alla quala la baselgia da s. Martin a Pitasch ei vegnida suttamessa sco filiala. La vischnaunca da Riein ei sedecidida sco ina dallas empremas vischnauncas dalla Surselva per la reformaziun.

Dapi il temps dalla reformaziun ei la matricula dils plevons cumpleta. Digl onn 1872 han Riein, Pitasch e Duin giu ina communitad da pastoraziun, Castrisch cun Glion dapi 1910.

Igl onn 1942 han las pleivs da Castrisch e Riein formau ina communitad da pastoraziun che ha cuzzau tochen 2005. Igl emprem plevon ei staus ser dr. Peter Dalbert, pli tard professer alla scola cantunala. Igl onn 2005 ein las pleivs autonomas sefusiunadas alla pleiv Castrisch/Riein/Sevgein.

(Autur: (c) ser dr. Jan-Andrea Bernhard)