anavos

El ha dau ad els la forza

DSC08871

Il Sogn Spert e siu operar

Avon che Jesus prendi cumiau da ses giuvnals ha el detg ad els: „Tgei che vus rugheis da mei en miu num, quei vi jeu far. Sche vus carezeis mei, sche vegnis vus a salvar mes cumondaments. E jeu vi rugar il Bab, e quel vegn a dar a vus in auter assistent (gidonter, il Spert dalla verdad) che stetti cun vus en perpeten. Il Spert dalla verdad, quel ch’il mund sa buca retscheiver…Mo vus enconuscheis el, perquei ch’el avda en vus e vegn a restar en vus (17)…Mo gl’assistent (il gidonter perencunter), il sogn Spert che miu Bab vegn a tametter en miu num, lez vegn a mussar a vus tuttas caussas e vegn a regurdar vus da tut quei che jeu mez hai getg a vus” (Gion 14, 14-17, 26).

Cu il gi da Tschuncheismas ei arrivaus, eran els tuts ensemen en in liug, eran ils apostels seradunai cun Maria (sia mumma), ed ils giuvnals en sala a Gerusalem (Fatgs dils apostels, 2, 1-13). Entras il sogn Spert ein ils apostels e giuvnals vegni sclari. Il sogn Spert ha mussau ad els tut e fatg endament ad els tut quei che Jesus veva detg ad els. El ha inspirau ad els ils dretgs plaids per annunziar la Nuviala de lur Signur ton als gedius sco als pagauns. Cheu ei vegniu ina ramur giu da tschiel, sco d’in vehement suffel che vegness, emplemend l’entira casa nua ch’ei sesevan. Entras il sogn Spert ein ils apostels e giuvnal vegni fortificai. Il sogn Spert ha scatschau ord lur cors la pintga cardientscha e la tema dils carstgauns, el ha consolau els ellas persecuziuns e dau ad els pazienzia el pitir. El ha dau ad els la forza da perfin unfrir la veta per la cadientscha. Entras il sogn Spert ein ils apostels e giuvnals vegni sanctificai („Jeu creiel el sogn Spert”, artechelchel da cardientscha). Il sogn Spert ei entraus en lur cors cun ses duns e sias grazias per restar adina leu. Che ein ils plaids dil profet secumpleni: „Ils davos gis vi jeu derscher miu Spert sur tutta carn (Joel 2, 28, Fatgs dils apostels 2, 17).

Tgei ha il sogn Spert operau enten ils apsotels, e per mia veta?

Il sogn Spert ha sclariu, fortificau e sanctificau. La vegnida dil sogn Spert sur dils apostels e sur la Baselgia festivein nus da Tschuncheismas, tschunconta gis suenter Pastgas, diesch gis suenter Anzeinza.

Il sogn Spert ch’ei vegnius da Tschuncheismas tier ils apostels e giuvnals ei ver Diu sco il Bab ed il Fegl. Perquei vegn el aduraus e glorificaus tuttina sco il Bab ed il Fegl (Register Tom I, manuscrit, 51-52).

„Ei vegn a daventar ils davos gis, gi il Segner, che jeu vi svidar da miu Spert sin tutta carn. Vos fegls e vossas feglias vegnan profetisai, vos giuvens vegnan a ver visiuns, e vos vegls vegnan a semiar siemis” (Fatgs dils apostels, 2, 17). „Cu ins ha udiu quella ramur, ei in grond pievel currius ensemen ed era tut surprius, pertgei mintgin udeva ils giuvnals discurrend en siu agen lungatg” (Fatgs dils apostels 2, 6, Il niev testament ils psalms, 1954, Cuera, Register Tom I, pagina 44-46, manuscrit). Plevon S. Jakab

 

DSC08438